مدونة على الطريق: 24‏/04‏/2011

أخبار العربية

شريط وذكر

ضع بريد ليصلك الجديد

مجموعات Google
ضع بريدك الإلكترونى ليصلك كل جديد فى المدونة
البريد الإلكتروني:

آخر الموضوعات

الأحد، 24 أبريل 2011

عايزين رئيس من ده

عايزين رئيس من ده

 

 

أحلام وأمنيات.. منها ماهو جاد ومنها ما تميز بالطرافة وخفة الدم ؛ صاغ المصريون من خلالها مواصفات رئيس مصر القادم كما يتمنى كل منهم فأطلقوا حملة على موقع تويتر للتواصل الاجتماعى حددوا من خلالها الشروط الواجب توافرها فى الرئيس القادم، وتجنبوا فى كثير منها ما كان يميز الرئيس المخلوع مبارك، رافضين أن تتوافر تلك المواصفات أيضا فى رئيسهم القادم وكان من أبرز تلك المواصفات مايلى :


- ينزل الشارع يمشي فيه بنفسه ويعرف الأخبار بنفسه من مصادرها المباشرة .
- يكون عنده مشروع قومى وياسلام لو خلى التعليم هو مشرعه القومى عشان نقدر نحرر العقول ونبنى فكر جديد يخلينا نبنى مصر صح .
- ميكونش ليه أى سابقة ولا أى ضربة لا ضربة جوية ولا أرضية ولا ضربة جزاء ولا ضربة شمس حتى عشان ميقعدش يذلنا ويقرفنا بيها كل شوية بمناسبة ومن غير مناسبة .
- يكون بيحب مصر بجد مش بالكلام .
- لا يقوم باستبعاد واقصاء لأى فئة من ممارسة السياسة مش عايزين نسمع كلمة محظورة تانى .
- ميكونش فى حاجة بتحز فى نفسه .
- ميقولش دايما فى خطاباته الإخوة المواطنون أو الإخوة والأخوات عشان بعد كدة بنضرب بالرصاص ولا بنطلع إخوة ولا حاجة
- تكون خلفته كلها بنات ويكونوا ملهومش فى السياسة ولا يعرفوا عنها حاجة .
- ميكونش اسمه صفة .
- يكون من ميدان التحرير .. مش ناطط عليه .
- مراته ملهاش دعوة بالستات ولا تعمل لهم كوتة ولانسبة فى أى حتة فى البلد والأحسن يكون مش متجوز أو أرمل أو يقعد مراته فى البيت .
- ياخدنا قبل حلف اليمين نشوف أملاكه و أملاك عيلته .
- يكون عنده مشروع نهضة للأمة وليس مصر فقط لأن مصر هى قلب الحضارة الإسلامية .
- يعامل المصريين كلهم كأسنان المشط وملوش فى الشللية لا هو ولا حرمه المصون ولا عياله .
- يكون قارئ ومذاكر تاريخ كويس قبل ما يكون فاهم سياسة ويعرف إنها عمرها مادامت لحد فمفيش داعى يتبت فى الكرسي قوى كدة ويضطرنا فى الآخر إننا نخلعه منه بالعافية .
- يكون بياكل كشرى وبيفطر فول وطعمية وياكل من العيش بتاعنا اللى احنا بناكل منه مش بيستورد أكله هو وعيلته وحكومته من بره بطيارات مخصوص.
- يكون مالوش في الكوره لا هو و لا ولاده. مش عايزين نشوف وشهم في أي ماتش و لا حد فيهم يتصل بخالد الغندور يقوم خلود يعيط.
- يكون بيفهم .. زهقنا من الناس اللى حافظة ومش فاهمة .
- يكون مبيخلفش عشان نتجنب مشاكل التوريث .
- يبقي معاه موبايل كارت مش خط وياكل من أكلنا ويلبس زينا .
- لا يهدي للمدام ولا للغرباء كنوز الفراعنة ويهتم بالمتاحف والآثار.
- ميطلعش فى التليفزيون يسلم على الإسرائيليين وهم لسة ضاربين غزة ويحرق دمنا .
- يحترم سنه وميصبغش شعره
- صلاة العيد يصليها فى أى زاوية ومش كل ما يروح يصلى يطلع فى التليفزيون .
- يمنع بيع أرض مصر وممتلكاتها و أى شيء يخصها لأى أجنبي ..آخرهم حق انتفاع وبس ويعرف إن فى أجيال جاية ورانا .
- ميكونش متجوز عشان نخلص بقى من حوار التوريث والسيدة الأولى ولو متجوز ميكونش عنده ولاد صبيان يكونوا كلهم بنات .
- كل أسبوع يعقد مؤتمر جماهيرى يستقبل فيه شكاوى الشعب بنفسه.
- يتحرك فى المرور زينا لغاية ما يحل مشكلة الزحمة أو يتحرك الفجر عشام ميقرفش الشعب
- لما يشوف علم مصر ينحنى برأسه محييا.
- مبيقولش قلة مندسة ولا أصابع خارجية ولا رأس الأفعى.
- يرجع الصناعة الوطنية لمجدها بقى شكلنا وحش قدام تركيا والصين.
- يعتصم فى التحرير لما يزهق من الحكومة.
- " يقدم تقرير مالى كل 3 شهور ويترجانا مرتبه يزيد عشان يبقي 4000 جنيه ".
- يهتم بإصلاح السجون ويطورها تحسبا إنه يكون واحد منها فى يوم ما.
- يترك حزبه أول مايمسك الرئاسة و يرجع له بعد ماتنتهى المدة.
- لو قاعد مع رئيس دولة تانية و بياخد قرار مصيرى يقوله استنى لما ارجع للناس اللى مشغلنى.
- يقعد فى شقة زى باقى الناس عشان القصور دى هندخل فيها الناس بتذاكر.
- يكون إنسان ..بيغلط ويعتذر..بيحاسب وينتقد ..
- كل شهر يزور الـ28 محافظة بمعدل محافظة كل يوم واليومين الباقيين يقعد فى البيت ميخرجش.
- ما اشوفش اسمه ولا مراته على أى جايزة أو مكتبة ولا مدرسة ولا شارع ولا محطة مترو ولا حتى موقف توك توك .
- ميكونش طود راسخ .
- ملوش فى محلسة رؤساء التحرير ولا يكون بيحب رؤساء مجلس إدارة الصحف .
- يكون حامى حما البلد مش ناهب وسارق خير البلد
- ميكونش محسوب على النظام السابق ولا من فلوله .
- ينجز فى الخطب مش عايزين خطب طويلة ودش على الفاضي وفى الآخر بيلبسنا السلطانية ومحدش بيفهم منه حاجة .
- كلمة يحز فى نفسي و لم أكن انتوى دول يلغيهم من القاموس بتاعه
- مبيحبش تتعمل له أغانى ولا أوبريتات مخصوص ويقعد يسمعها وهو بيهز فى راسه من السعادة
- لاصعيدى ولا منوفى ..بحراوى عشان فسفوره يكون مضمون وميكلفناش سفريات علاج كل شوية
- ميبقاش عسكرى ولا شارك فى أى حرب عشان ميقعدش يذلنا بيها كل شوية
- يوجه خطابه للأمه عبر اليوتيوب
- يقدر يحقق الوحدة العربية ويكون هو القائد .
- يسمع للموعظة والنصيحة حتى لو من أعداءه فى الفكر
- يقود البلاد بمبدأ سيدنا أبو بكر الصديق رضي الله عنه : أطيعونى ما أطعت الله فيكم فإن عصيته فلا طاعة لى عليكم
- مالوش دعوة بشرم الشيخ خالص احنا هنسمحله بعشة تبع الرئاسة فى رأس البر
- يكون له أكاونت على تويتر والفيسبوك
- نكون عارفين عربيته و يمشي من غير حراسة و يوم الجمعة يركب المترو .
- يروح يزور طره كل شهر عشان يتعلم من التاريخ ويمشي عدل والا هيحصل اللى قبله
- لا اسمه بالكامل ولا حد من قرايبه يكون فيه مبروك أو مبارك أو حتى الله يبارك فيك
- يكون صعيدى المنايفة كفرونا
- ميكونش ليه أدنى علاقة بشرم الشيخ ولا كفر الشيخ أو أى حاجة تنتهى بشيخ ويكون عنده فوبيا من الطيارات
- يعرف كويس ان لغة الحوار مع الشعب اهم بكتير من اتخاذ القارات
- ميكونش مشترى نجمة فى السما أو مجنون و بيكتب اسمه على بدله
- متبقاش صوره فى وشنا فى كل حتة نروحها
- يوم ما تحصل كارثة لاقدر الله يتحمل المسئولية
- يشعر دائما أن وظيفته مسئولية شديدة و أمانة وليست سبوبة و مصلحة وتظبيط
- مش كل ما يشيل وزير فاسد يعينه فى المجالس القومية المتخصصة
- يعرفنا هو و عيلته بقبضوا كم فى الشهر
- له عربية واحدة بس هو وعيلته وهو اللى يروح يعملها صيانة فى التوكيل .
- يكون عنده كرامة وبيفهم بسرعة عشان لما نقوله ارحل مش عاوزينك يمشي على طول وميقرفناش
- يسمع كل يوم على الريق أغنية دامت لمين

- وانا اضيف :

عاوزين رئيس يصلى الخمس صلوات فى المسجد

عاوزين رئيس يعرف يكون امام فى الصلاة

يعرف يقرأ القرآن 000يعرف دينه قبل دنياه

 

واخيرا000

اضحك حتى تستلقى على الإرض